A pesares da súa recente aparición, o acordeón ten ocupado unha ampla franxa dos repertorios da música tradicional de Europa. En Galicia soubo adaptarse aos ritmos propios e desempeñar, progresivamente, diversos e variados papeis que van dende aportar soporte harmónico e diversidade tímbrica aos grupos de gaiteiros ata desemvolver funcións de solistas, acompañante dos cantos populares nas festas xunto ás pandereteiras e os coros galegos, e participando nas formacións da música folk.
Deixa que soe recolle ese repertorio tradicional, de todos coñecido, dun xeito sinxelo, apto tanto para os afeccionados que se introducen na práctica co instrumento, como para aqueles intérpretes avezados que desexan coñecer, ou afondar, no repertorio tradicional galego.
